من المعروف أنه لا يمكن عمل نسخة image أو صورة عن الويندوز XP و ذلك لأنها لا تعمل إذا اتغيرت عليها البورد ..
لذلك و بعد القيام بالأبحاث و صلنا الى مفاجأة لم تكن متوقعة !!

من السهل عمل نسخة XP مع كل البرامج و يمكن أن تعمل على أي كمبيوتر بإختلاف القطع !!
و بعد ما تنزل النسخة عالكمبيوتر .. بيضل عليك التعريفات ..
في بعض البرامج ما اشتغلت .. مثل الـ ACDSee 4 و الاصدارات اللي بعدو كللها.. لسا ما بين معنا غيرو ما اشتغل .
أما الكاسبر فاشتغل مع التحديث اللي كان نازل وقت عملنا الصورة ..

قبل ما نكتب الطريقة .. رح نقول كيف دورنا عالحل .. منشان الإفادة :

مرة كنت قاعد على كمبيوتري و مبسوط ..
جبت برنامج الأتوكاد 2008 و للأسف طلع بطييييييء .. شو الحل !
قررت حدث الكمبيوتر .. و رح اضطر غير البورد .. !
النظام عندي XP و كلشي موجود رح يطير ..
لذلك بحثت عالانترنت عن شبب أنو الـ XP بيحنتر لما بتغير البورد أو لما بتغير شي مهم من قطع الكمبيوتر .. و طلع السبب أنو نوع من الحماية ..
و الحل أنو في برنامج أسمو Deploy بيحل هالمشكلة .. لكن أنت مضطر تدخل مفتاح المنتج مرة ثانية و كمان لازم تعبي البيانات كللها من جديد مثل اسم المستخدم و الشركة و هاإعدادات اللي بتطلع لما بتنزل الـ XP بعد الفورمات .. !!
و الأعجب من هيك أنو البرنامج موجود عالسيدي مع نسخة الاكس بي !!
استخدمت البرنامج و مشي الحال ..

هلأ الطريقة و الشرح ..
بعد أبتنزل البرامج و هالشغلات .. بدون التعريفات ..
منفوت عالسيدي و عالمجلد Support .. منلاقي ملف أسمو Deploy عبارة عن ملف خزنة مضغوط ..
منفك الضغط و منعمل مجلد وين مكان و منحط فيه هالملفات ..
منشغل البرنامج اللي أسمو SYSREP من المجلد .. منحط كل إشارات الصح تحت ما عدا :
Don't regenerate Security ... أبعرف شو كفايتها ..
و أهم شي ما نشيل إشارة الصح من عند الـ Mini Setup
تحت بيكون مكتوب Shutdown وهو منشان يطفي الكمبيوتر بعد أبيخلص البرنامج شغلو .
آخر شي منكبس على زر Resale ..
بتطلع رسالة أنو "" أنت بدك تعمل Regenrate لمدري شو (هي اللي ما حطينا إشارة صح قدامها) و هذا بتعملوا بس لما بدك تعمل Image للنظام "" ..
منقللو موافق ..
و بيطفي الكمبيوتر ..
هلأ منقلع من سيدي الإقلاع و منعمل صورة عن النظام ..
و أهلا و سهلا .. صار عندك صورة لنسخة XP بتشتغل على أي كمبيوتر ..

ملاحظة .. بعد أبتعمل Resale إذا قلع النظام رح يطلعلك الـ Mini Setup و لازم تعمل صورة عن النظام بعد ما يطفي الكمبيوتر بعد الزر Resale و إلا بدك ترجع من الأول ..
حيث الصورة كلما بتفردها على جهاز رح يطلع هذا الـ Mini Setup و بتعبي البيانات ..
و بعد أبتعبي البيانات بيعيد الاقلاع و بتفوت عالنظام بشكل عادي .. يبقى عليك التعريفات .

هام جداً :
- الـ Mini Setup لسا ما بيكون اتعرف على الفارة أو الكيبورد الـ USB لذلك لازم تكون عم تستخدم فارة أو كيبورد PS2 منشان تقدر تكبس عالزرار ..
- إذا عملت النسخة الأصلية للنظام على معالج Intel ما بتشتغل على معالج AMD و لكن العكس غير صحيح .. فالنسخة المعمولة على الـ AMD اشتغلت وين مكان ..
- عالهاردات الـ Raid و الـ AHCI هالطريقة ما بيمشي حالها ..

تحياتي
علاء

سلمت يداك صديقي .... بجد موضوع كاسح وما اعتقد انسمع فيه ... يا زلمي انتي مبدع بمعنى الكلمة .

ماشاء الله عليك الله يزيدك كمان وكمان

تقبل مروري .. ورح حاول اعملها وانشاء الله تنجح وبقولك شو النتيجة كمان

مشكور صديقي على المعلومة المفيدة
ما بعرف لكن أنا شخصيا بفضل إعادة تنزيل النظام من جديد ,جربت كتير برامج عمل صورة متل ghost لكن دائما كنت حس إنو أداء الجهاز بيختلف لما ينزل من جديد
لكن هالطريقة مفيدة و أكيد رح جربها

بالطبع أخي غسان ..
لكن هالطريقة هي بديل الفورمات بالنسبة للمايكروسوفت نفسها !!

هالبرنامج "Deploy" شغل المايكروسوفت .. و بالمايكروسوفت بيفضلوا هالطريقة على الفورمات ..
و المذكور أنو :
نزل النظام و برامجو بعدين أعمل عنو صورة بهذا البرنامج .. منشان تقدر تنزلها على أي كمبيوتر ..

لكن الفائدة الأكبر لها :
اتخيل كمبيوترك عليه الكثير من البرامج و المستخدمين و اختصارات الويب و هيك شغلات ..
بدك تشتري جهاز أحدث !! .. ساعتها أنت مضطر تفرمت و ترجع تنزل كلشي ..
بهالطريقة أنت مانك مضطر تفرمت .. بتنقل النظام الى الكمبيوتر الجديد و بيرجع متل ما كان !

تحياتي

مشكور صديقي على التنويه,و ياريت عملت هالطريقة لما اشتريت اللابتوب الجديد
بتعرف اللابتوب بتجي عليه نسخة ويندوز مع مجموعة برامج و للأسف مو جاي مع الجهاز سيدي نظام لذلك اضطريت نزلو من دي في دي من عندي وراحت كتير برامج حلوة من توشيبا
مشكور صديقي أكيد رح جرب الطريقة قريبا

ممممممممممممممممممممممممممم
فكرة الطريقة كتير معقدة بس طلعمت سهلة
ومنزمان يا علاء ماخطر ع بالي أسألك
مشكور كتير هلق فيني أخلص من النسخة القديمة يالي عطيتني ياها
مشكوررررررررررررررررررررررررررررررررررررررررررررر

كل ما بفوت عالمنتدى بتفاجأ بشي جديد وانا بهنيك خيي علاء شي حلو كتير
وانشالله من حسن لاحسن

urwaeid كتب:كل ما بفوت عالمنتدى بتفاجأ بشي جديد وانا بهنيك خيي علاء شي حلو كتير
وانشالله من حسن لاحسن

أهلا و سهلا فيك
و إن شاء الله بتلاقي عنا كل شيء مفيد
تحياتي

الف شكر يا أخي والله انك سويت فيني خير
انا مهندس كمبيوتر وأتعب لما انزل لكل كمبيوتر ويندوز والبرامج من جديد لكل جهاز
مشكوووووووووووووووووووووووووووووووور
الله يوفقك ويزيدك من علمه

العذري كتب:الف شكر يا أخي والله انك سويت فيني خير
انا مهندس كمبيوتر وأتعب لما انزل لكل كمبيوتر ويندوز والبرامج من جديد لكل جهاز
مشكوووووووووووووووووووووووووووووووور
الله يوفقك ويزيدك من علمه

آمييييييين وياك يا رب
لسا المفاجأة القادمة أحلى من هي
شو رأيك بنظام إقلاع مباشر على أي كمبيوتر ! .. بتستخرج الصورة ببرنامج الجوست أو الأميج درايف و بعدها بتقلع النظام و بتعرف القطع و خلص جاهز
انتظر لبين ما اتأكد من فعالية النسخة تماماً .. بعدها بكتب الطريقة كاملة
و أهلا و سهلا فيك دائماً

مرحبا أخ علاء
بجد هذا الموضوع في أفادة لكل شخص لسا بيستخدم أكس بي 100% ومشكور على هذه المعلومات القيمة
شكرا [ندعوك للتسجيل في المنتدى أو التعريف بنفسك لمعاينة هذه الصورة]

SINGER كتب:مرحبا أخ علاء
بجد هذا الموضوع في أفادة لكل شخص لسا بيستخدم أكس بي 100% ومشكور على هذه المعلومات القيمة
شكرا [ندعوك للتسجيل في المنتدى أو التعريف بنفسك لمعاينة هذه الصورة]

أنت حطيت أيدك عالجرح "لسا بيستخدم أكس بي"
المفاجأة أنو شو رأيك ويندوز 7 أو فيستا بيعمل هيك
بعد ناقصني برنامج صغير
انتظروني
تحياتي

انا بالمنتدى عضو جديد وفتشت كل الأقسام كلها جلوه بس هالموضوع بالذات بيجنن وما أتوقعت ابدا انه ممكن تنزل نفس النسخه ع اي كمبيوتر أنا سألت عن الموضوع . قلي المهندس . انه السبب تعريفات اللوحه الأم . هاد السبب
بس عنجد شكرا انا هلق ممكن اعمل نسخه وحده فيها كل البرامج ونزلها ع اي كمبيوتر بده فرمته لأن انا بشتغل بقسم الصيانة

moony-mon كتب:انا بالمنتدى عضو جديد وفتشت كل الأقسام كلها جلوه بس هالموضوع بالذات بيجنن وما أتوقعت ابدا انه ممكن تنزل نفس النسخه ع اي كمبيوتر أنا سألت عن الموضوع . قلي المهندس . انه السبب تعريفات اللوحه الأم . هاد السبب
بس عنجد شكرا انا هلق ممكن اعمل نسخه وحده فيها كل البرامج ونزلها ع اي كمبيوتر بده فرمته لأن انا بشتغل بقسم الصيانة

أهلا و سهلا فيك أخي ..
بالنسبة عندي في الصيانة صار عندي أكثر من صورة عن النظام متضمنة كل البرامج و منعمل استخراج و بعدها التعريفات
بس عم لاحظ مشاكل أداء ..
بجوز من الكاسبر اللي بيجي جاهز بالنسخة !!

تحياتي